520 Lay cingte congtong papelo i patirengan

520 Lay Cingte congtong papelo i patirengan (520賴清德總統發表就職演說)

Miketon patireng to nikapolongan nga’ayay cemahaday fa’elohay a Taywan (宣示打造民主和平繁榮的新臺灣)

2024/5/20

Conghuaminko saka 16 rekad ongtong ci Lay cingte (Lai Qingde) mararamod ato micokeray congtong ci Hsiao Bi-khim anini (20) romi’ad ’ayaw no lahok i ka’ayaw no congtongfo a potal midemak patireng a sa’opo, congtong ci Lay cingte a o “Patireng to nikapolongan nga’ayay cemahaday o fa’elohay a Taywan” ko patosokan, piini to patirengan a papelo, polong no sasowalan:

O micokeray congtong ci Hsiao Bi-khim, polong no kalali’ayan kitakit a kakeridan ato tadamaanay lafang, kasakitakit a torokos, itiniay a polong lafang, ka’ayaway no tilifi, ira ho i alayay minengneng a nga’ayay widang, ato polong finawlan no kitakit, nga’ay ho:

I kalakapahan ho ako i, cifaloco’ to nga’ayay pa’oripay a ising. Kala sician to ako, ci faloco’ to sapifalic to Taywan. Anini, tomireng kako itini, misafaloco’ kako to saka comahad no kitakit.

Misaki’emelay ko faloco’ ako, milayap to patorodan no finawlan, mapatireng i saka 16 ekad congtong no Conghuaminko, o mamidotoc kako to masalaloma’ay a kimpo no conghuaminko, citodong mikerid to kitakit a tala’ayaw a romakat nipa’orongan.

Mahirateng aniniay romiad itiya i 1949 mihecaan, nai midemak to pi’emetan, polong no finawlan itiniay i nisatekedan to’emanay mihecaan.

I 1996 mihecaan anini, sa’ayaway saka cecay misingkiwan congtong no Taywan patirengan romi’ad, pasi syakay no kasakitakit parotoh, o conghuaminko Taywan oci salongocay a misatataday a kitakit, o finawlan ko ci salongocay.

Anini 2024 miheca a romi’ad, malaheciay to saki natoloay kafafalifalic no kasarekad no Tsaywan, sa’ayaw oyaan to a kasarekad ko pado’edoay mikowan, so’elinay paselak to saka tolo a rekad, o fayfay no Taywan micomod i maledefay a salifet, mipalowad palahad to kacifaloco’an fa’elohay a tato’asan.

Onini a nirakatan, o finawlan no nian a sera, o ’ayaway mido’edo ko aikoray, oci mikinafalahay pacakat ko saka ci haci. Talacowa o karorayan, naka malaheciay to ita ko nian.

Imatini to nian romi’ad, caay ka dengan o piwacay no fa’elohay sifo a pisatapangan, o piliyawan a milayap to caayay ko rahodayan ciniala to kalowid no kapolongan.

’Aloman ko tamdaw to paskayni i takowanan ato micokeray congtong ci Hsiao Bi-khim a maala, o nano “pipeleng to 8 miheca to kacacaliwan no kasarekad kawasan”. So’elinay to, o sakaci kapolongan o nano finawlan ko citodongay, kahacecay no pisingkiw, awaay koya mangahay a kawasan, dengan o nano finawlan a nirikecan a mitomadaw to saki mikowanay a kasarekad, sa’elnay nipili’an to saki ikoray no kitakit.

Miahowid kako, ’ayaw no 8 mihecaan, ci Tsai Ing-wen congtong, Chen Jianren micokeray congtong ato kapolongan no citodongay a nisa’icelan, saka comahad to Taywan, patireng to ’imeceday parana’an. Imatini, pi’epi’en ita ko kamay to katadamaan nangra.

Miahowid kako to finawlan mapolong to picoker takowanan, a caay ka fiyer no papotalay a ’icel, tanektek ko pidama mihimaw to kapolongan, tala’ayaw romakat; aay ka tararikor, mifelih to fa’elohay felih no likisi.

Ikor no rekad a romi’ami’adan, a o “O nika mo’ecel no demak, kalasini’adaay faloco', nipisapo’eneray faloco'”, “O niya tamdaw ko nengneng to finawlan”, caay ka pakangodo i kahacecay to paso’elin ato patorodan. O misarooday ko tayal no fa’elohay sifo, pasadak to makapahay a nidemakan, milayap to pitomadaw no finawlan. O masafa’elohay mafalicay ko sapidemak niyam to dademaken, misanga to faelohay nengnengen a sician no Taywan.

Saka cecay, Pidemak pirikec masasihakelongay ko kafafolod, malalilid micikeroh to dademakan no kitakit. (一、行政立法協調合作，共同推動國政)

Anini mihea saka tosa folad mapatireng ko fa’elohay pikaykian no kitakit, naikoran no 16 mihecaan no Taywan i, miliyaw haca “caayay ka ta’elif a toloay kasarekad” a Lifayin. Misiayaw to nian fa’elohay sician, ira ko papinapina a tamdaw ko dahekatay, ira ko papinapina a tamdaw ko calemcemay.

Pasowalen ako kamo, onini i o nano nipili’an no finawlan fa’elohay pinangan, tona o fa’elohay ko hirateng minengneng to nian a “caayay ka ta’elif a toloay kasarekad”, o pahapinangay to kasarekarekad no sician manga’ay pahapinang to no niyah a harateng, saka nga’ay mafafolod mitamorong to salifet no kitakit.

Nikawrira, o pinengneng no finawlan to saki dademakan piliclic no kasarekarekad sician, ira to ko ta’angay a dahekatay. Kalalifelifet no kasarekarekad haw i, ka iraen ko mafafoloday a harateng, o pi’awas a rakat no kitakit o tanektekay.

O demak no pikayki no Lifayin, o mamido’edo to rayray no mo’ecel, mangodo ko ’alomanay to caayay ka’aloman, caayay ka’aloman mido’edo to ’alomanay, itiya acaay kasasiwtoc, pararidsa ko syakay a masasinga’ayay.

Itini i kapolongan a syakay, o saka ci depoc no finawlan, o parana’an no kapolongan ko saaanan; o saka cidepoc no kitakit ko ’ayaw no kasarekarekad depocan, ono kasarekarekad a patodongan a tatayalan ko nian. Tona kasarekarekad miikeroh to sasarikecen, saheto o matatodongay i kimpo, o “Ikaka ko finawlan”, “Ka’ayaw ko kitakit” ko hirateng, o kitakit nidemakan dahdah sa makacalay mapacowat.

Sincenyin ci Zhuo Rongtai yinciw ko mikeriday to salaloma’an midemakay kasakapot, o mamili’ayaw misalof to sakanga’ay no syakay, o kalacecayan no lalomaay papotalay kasafafolod a kaainian, masarooday ko pidemak, masafaelohay ko harateng, misalof to kaalemceman no finawlan, o saca’of no finawlan, mipatado to finawlan.

Sakasaan, naikoran no 0403 kafadesan sapipalolol a tatayalan, midemakay i matini. Miliyaw haca kako misomad to makariangay a tamdaw, mihinom to mapadesay. Miahowid kako to polong no mipadangay to sapipa’orip ato mipalowaday patireng a matayalay a finawlan, ato miliyaw haca miahowid to kasakitakit a syakay to pikiharan ato piokeran.

Sakakakaay sifo malaheci to ko pihalaka padefong to 285.5 walwalan payso, o sapipadama patireng ato kadademakan palowad, patado to finawlan no Kalingko manga’ay maratar mapa’orip ko saki’orip.

Ono mako to saki sakakaay ato kasaniyaro’ a kasasidama a mafafolod, pidemak ato pipatireng to rikec ko kasasipadangan a midemak, pafaloco’an konian, nanay mikihatiya ko polong finawlan no kitakit malakayat misa’icel, malakapot mineker to sakapolongan no Taywan, mihadimel to Intoyang (India Ocean) Taypinyang (Pasific Ocean) a kasasinga’ay, micikeroh ko kacemahad no hekal.

Saka tosa, Nikapolongan Taywan, kalo’edil no hekal. (二、民主臺灣，世界之光)

Kasa finawlan no kitakit, nikapolongan, kasasinga’ay, kacemahadan o rarakaten lalan no kitakit no Taywan, kalocalay no Taywan ato hekal.

O Taywan i “Safit no nikapolongan no hekal” a dawdaw, o tatayni to ko kasenengan to’ek a nikapolongan no Taywan.

Nani pisingkiwan to congtong no Taywan i, mala o comahaday a nikapolongan kitakit itini i polong no cikiw. Mipadoedo kita to kacakat salongoc no tamdaw, pasihekal pahapinang to nikapolongan mapakoniraay a ciepocay.

O Taywan sarakatay itini i Asiya malalenay ko raramod i rikec a kitakit.

Mapahapinang to no Taywan, no nikapolongan a pitena’ to lifong ikaka to no tekedan pitena’ to lifong.

O Taywan ano no nikapolongan sa’osi, ano eca pakoniraan to a pipalecad, o saka cecay saka tosa masilsil itini i Asiya. Nikapolongan a Taywan malo ’edil to no hekal, onini a kasenengan o no polong no finawlan no Taywan.

Ikor to, fa’elohay sifo o papadoedo a malo’icel no nikapolongan i Taywan, micikeroh to kacomahad no kitakit, misa’alolong i kasakitakit a matatahic.

Saki laloma’, mipili’ kako to citanengay a tamdaw, makoracay ko pidemak, milaheci to nikapolongan pikowan, patireng to mafohatay sifo, o “mafahatay ta’eselay kahapinang”, “o finawlan ko tawki” sanay a herateng, patoror to ’alomanay mikihatiya kapolongan telekan, pado’edo micikeroh to 18 miheca a finawlan salongoc, mafafolod milaheci to nafaloco’an no kitakit.

Saki papotal, mipadoedo kita to nikapolongan a kitakit, matiya kafafolodan i nikapolongan, masasicofel i kasasofal a kacomahan a niketketan, malacecay miliyang to mangahay ratoh, mipa’icel to nikapolongan a sakakodait, sapisi’ayaw to masamaamaanay salifet, mala nikapolongan i hakal MVP ko Taywan.

Saka tolo, nikapolongan Taywan, o sa’iwas kanga’ayan no hekal. (三、民主臺灣，世界和平舵手)

Caay ka ci’aca ko kanga’ayan, awaay ko malowiday i kalaloodan. Ano cila miheca, paherekan saka tosa lalood no hekal, to 80 mihecaan, malecad o Taywan ato kasakitakit, nano nitanengay to roray no kalalood to palowadan lalan, saka iraay aniniay kacomahad a pahecian, awaay ko cima tamdaw mangalayay to pipeleng i kalalood.

Anini, Russia Ukraine kalalood ato Israel Hamas kalalood, padoedo iho misetol to hekal, o sofitay no Congko misamawmaw i apelahay a patalaw, o nengneng no polong no cikiw to sanga’ay o sakaci milengatay to kalaloodan.

O Taywan itiniay i “saka cecay kacacofelan” malalood a kaitiraan, mificfiay to hekal kaitiraan no sician a comahad. I ’ayaw 1921 miheca, ci Jiang Weishui singsi mi’eses to, Taywan o “Mikacaway no sacomod to saka nga’ay no hekal” saan, anini itini i 2024 mihecaan, matongal to ko katadamaan no Taywan.

Takaraw to ko kafafolod i kasakitakit, tanektek ko kanga’ay no kasasekal no Taywan saan, caay ko mamalasawad i saka o karihadayan ato kacomahadan i polong no cikiw.

O sapisi’ayawaw to mici’iwiay demak no kasakirakit, i hekalay kasakitakit mitekaay to misarocod to kafafolodan, sapi padoedo sakanga’ay tanektek no kasasofal.

Itira nacila a folad, malaheci to no Amilika ko saki “Saka rihaday sapalolol to payso i Intoyang (India Ocean) Taypinyang (Pasific Ocean) a rikecan” a pilikec, sapa damso to In-Tay sa’etal rafas sakarihaday a sapadama, micoker to kasasekal no Taywan kanga’ayan a tanektek.

Mi ahowid kita to i hekalay kasakitakit to saki Taywan a mipamotek ko nengneng ato picokeran, o mamiketon kita pasi hekal: nikapolongan mapakonira, saka’eca katararikoran a nipararidan no Taywan, dengan o kanga’ayan ko nipili’an, o sakacomahad ko patosokan sakatahada’oc rihaday.

Nawhani ikoray a kasasekal, o saka pitelek to pakayraan no hekal a mafiyor, midotoc to nikapolongan kita o Taywan, malo sa’iwas no kanga’ayan, fa’elohay sifo mami’imer to nian “sepatay a sapararid”, caay ka tararikor caay pikico’ay, mipararid to kanga’ayan.

Mipaini kako to Congko, paterepen ko sapipatalaw milood to Taywan, malakapot to Taywan mitamorong to nipatorodan no polong no cikiw a ’inorong, misa’icel mirarid to Taywan a riyar ato kasa’etal a kanga’ay a tanektek, pahapinang to katalawan kalalood i polong no cikiw.

Haling’ayay ko finawlan no Taywan, malali’ay to tamdamdaw. Saan to kako, ano kakeridan no kitakit o saka lemed no finawlan ko niharatengan, saka, o kanga’ay no kasasekal no Taywan, masasing’ayay, kasasinga’ay no ka’oripan, onini i, o kalalenan no patosokan.

Orasaka, misafaloco’ kako to pisapinang no Congko minengneng to so’elinay kaira no Conghuaminko, kangodoen ko nipili’an to finawlan no Taywan, pasadaken ko nga’ayay harateng, ato nipili’an no Taywan finawlan a cirikecay sifo, itini i malalenay, masasingodoay a pidotoc, kao malalicayay ko sapikotay to kasasico’ay, o kalacicay ko sapikotay to kasasitena’, midemak to mafafoloday, manga’ay haki pipatareng to kacacofecofel no pirarakatan, ato kasasinanam no mitiliday a misatapang, malakapot pasayra i nga’ayay ko kalita’anan.

O finawlan no kitakit, ira ko sakacinga’ayaw a faloco’ no mita, nika aka ka o maoratay harateng. I kacaay ho pisawad no Congko to sapiloodaw to Taywan i, o kafana’an no finawlan no kitakit: talacowa milayap to nisowalan no Congko, sapifalicaw to salongoc no niyah, o Congko caay ka sapisawadan to sapisamawmaw mi’emod to Taywan.

Misi’ayaw to nai Congkoay a masamaamaanay sapikari’angaw, o papasadak kita tio sapidipotaw to kitakit a faloco’, pacakat to polong no finawlan midimokos to kitakit a harateng, patanektek to sakarihaday no kitakit a rikec, misarocod milaheci to “kanga’ayan sepatay sacoker dademaken a halaka”, mipa’icel to sapitena’ no sofitay, patireng to kanga’ay no kicay, pahapinang to tanektekay pidotoc to ’icel no kakeridan to kakiharan no kasaetal, ato micikeroh to ci’epocay kacacofelan a demak, masasi’afang to nikapolongan kitakit i polong no cikiw, palakiting to kalecadan manga’ay, pahapinang to katalawan a ’icel, saka eca ka lalood, o kaci’icel ko patosokan a manga’nga’ay.

Saka sepat, nikapolongan Taywan, micikerohay saka comahad no hekal.(四、民主臺灣，世界繁榮推手)

Mangalay ko Taywan to hekal, manga’ay ko hekal to Taywan, caay ka dengan o pifohat to fawahan ko Taywan, micomoday to i salaloma’an no kakeroan no hekal ko Taywan.

Misafaloco’ to ikoray a hekal, icowacowa iraay ko Pan-Taw-ti, tapelik no AI pasayniay to. Aniniay a Taywan, mamol to fana’ a misanga’ to Pan-Taw-ti, tomirengay i pifelih ciwsing no AI, o “polong no cikiw nikapolongan i malonolaya calay” a safawahan, mifiyor to kicay no hekal a comahad, ato sakalemed no tamdamdaw ma’orip ato kacomahad.

Kasa finawlan no kitakit, tona paratoh kita, o ikoray no Conghuaminko Taywan, nai 2300 ’ofad a kapolongan nitelekan. Nitelekan ita a ikoray, caay ka dengan o ikoray no kitakit no mita, o ikoray to no polong no hekak ko nian.

O matamaay ko rarakaten no mita, kacomahaden ko kinairaan, malo sakacomahad no hekal ko picikeroh, cecay ko ’awas no Taywan, tala’ayaw mi’awas ko hekal.

I ’ayaw, o kala Sincenyincang, micokeray congtong kako i, tayra kako i kasa niyaro’aro’ no mitakit mihomong to kinairaay, itiya mafana’ kako to mico’enepay ato kacilongocan no Taywan. I ikor to, o mamatahic ko sifo mikinairaay, mirepet to toloay a pasayraan, micikeroh to sakacowat no Taywan.

Saka cecay pasayraan, “Mica’engaw to ikoray, midepoc to taneng”. (第一個方向是，「前瞻未來，智慧永續」。)

Misi’ayaw to katalawan kafafalifalic no romi’ad, o mamisaki’emel kita milaheci i 2050 mikorac to kafalic. Misi’ayaw to polong no cikiw tanengan a salifet, itini kita tomireng i pan-taw-ti a felalacay sirikon pala a parana’an, misa’icel micikeroh to Taywan mala “Tamdawan taneng a pala”, pala tamdawan taneng kinairaan, pakalah to tamdawan taneng ko pisafa’eloh, o tamdawan taneng ko pisa’osian, pacakat to ’icel no kitakit, ’icel no sofitay, ’icel no tamdaw ato ’icel no kicay.

O mamicowat to sakafa’eloh a saparakat to no kicay, pakayni i ticito ko pifali, ato mikorac to kafalic a ’icel no ’erecan, mitahic to ka’emingay mipakairaay pacakat to kafalic, pasihadidiay ko kalomahad, misanga’ to citanengay midepoc to fa’elohay Taywan, misanga’ to saka tosa kakafahekaan kicay no Taywan.

Dengan o pidefong to fa’elohay pisanga’, mikongling to fa’elohay to’ek masimeday katala’ayaw, ano o nilalatan tinaw, kikay tamdaw, yin-serayan, ano eca mahidefongay sapaising, kasasofal a ca’engawan kakki, salalekoen no mita a midefong, pakayraan no kapah misafaloco’, mitadimel to sakiikoray no hekal mili’ayaway paenarar to Taywan.

Saka tosa pasayraan, “Kalalifet i serayan. Misolap to riyal”. (第二個方向是，「競逐太空，探索海洋」。)

Misetek kita to patosokan, malo saka awaayay ko tamdaw a hikoki nikapolongan padamsoay calay i Taywan a Asiya ciwsing, micowat to ikoray to’ek saparatoh pakalaenoay Isi (wiysing), micomod i polong no cikiw serayan a kinaira.

O mamisolap kita to riyal, palasafangcal o riyal a kitakit, pakadofah to finawlan i riyalay ’orip, sato mipacefong i riyalay kakki a mikingkiw, micikeroh to riyalay kinaira a macowat, pacakat kalalifetan no kitakit. Pala micowatay to kasahirahira no kicay ato kinaira no Taywan, awaay ko caayay ka laheci.

Saka tolo pasayraan, “Misilsil i polong no cikiw, palenak i polong no hekal”. (第三個方向是，「布局全球，行銷全世界」。跨太平洋夥伴全面進步協定)

Maherekay to ko Taywan misingsi sapikapot to CPTPP (Milacal to Taypingyang malahakelong polong macakat telek, Inkiris: Comprehensive and Progressive Agreement for Trans-Pacific Partnership, CPTPP), misafaloco’ kita miai to sapikapot to sa’etalan kicay palekapot; mikapot to nikapolongan kitakit i hekal a kasasitelek to kasasidefong mapa’orip kasasetek, masasileneng ko kalali’aca a kakiharan; at/ sapisalof to langtoay sapasata a demak, masasipangala’ to sakacowat no kinaira.

Pataneteken ita i polong no cikiw ko padamso calay ko parana’an, sanga’ayen mirepet ko katatodon kafalic no sici to saka ci kalali’acaan, micowat to pan-taw-ti, pamdawan taneng, sofitay a tayal, sapi’emet to sakang’ay, ato saka tosa to’ek ratoh “limaay paso’elin a kinairaan”, saka nayar pifalic to pidefong no taliyok, mihamham to misiwfayay no Taywan minokay midefong i Taywan, pa’icel to itiniay a palatayalanmisadadahal to pidefongan, mirenok ko lamit i Taywan.

Paini kako to kasaromaroma patayalay a widang mihosyo: o kasacecay saheto o macodahay ko faloco’, milaop to sakatadamaanaw, cifaloco’ ko sifo pa’icel mipadama, no Taywan a kinairaan manga’ay ko katomireng i Taywan, misilsil i polong no cikiw, palenak i polong no hekal.

Ci’icel ko Taywan, mala “caayay kaserer a kitakit i ni kicay a romi’ad”, ano icowacowa masadak ko cidal, mapalikat ko pakinairaay no Taywan, palemed to itiniay a macowat, pala nga’ay kadofah ko ’orip no finawlan no Taywan.

Saka lima, o lipahak no finawlan ko lalipahakan, o kesem no finawlan ko kakeseman. (五、樂民之樂，憂民之憂)

Paso’elin kako, o heci a kacowat no kicay, o mamiraoy ko finawlan. Ikor to, i picikeroh to “pafaloco’ay tayal no kitakit”, mipadadahal to picefong no syakay, mipatireng kako to ciolahay ato ci ngodoay faloco’ a syakay no Taywan. O kapah tamdaw pakanengneng to pafaloco’an, papikedan tamdaw milaheci to nisafaloco’an, malitengay tamdaw manga’ay mihadoy to sakalemed, kalasamo’ay tamdaw ci madipotay. Kahacecay tamdaw a kahacecay lekad, o papakalayap to sacoker no sifo.

Ikora i, kaemangay padipot, mato’asay sadama, syakay kamaro’an, o maminayar misadadahal; dafong a ’aca, loma’ a ’aca, pakoyocay cidafongay a kalala’ed a demak, caay ka tolasen mifalic; kanga’ay no kakaenen, kanga’ay no lalan, kanga’ay no pitilidan, kanga’ay no syakay a calay saka’orip, padoedoen paki’emel; ira ho, saki kiwiko, hoyin, palamo’ecelay kasa pifalic a tayal, saheto o papadoedoen a tayal.

Kafana’an ako ko finawlan no kitakit to karawraw ato hinatala a saka’orip, o maanan to kakiheren a demakan, kangalayan no syakay mifelih, o mamisarocod ko sifo misi’ayaw, misa’icel.

Mangalay kita to sakatakaraw no kinaira a lifon, micikeroh kako to kacakat no kinairaaw, mipalocad to nga’ayay a lifon a taliyol.

Mangalay kita to nga’ayay kanga’ayan, misarocod kako mipeleng to mikelotay to payso, kowang, sawarak ato misamangahay.

Kangalayan no ’alomanay o katanektek a padamso to dingki, micikeroh kako to saka tosa a kinairaira pisiyol, micowat to kasasiromaroma a kasahirahira, tengengan dingkian calay, mipa’icel to karocok no dingki a kakodait.

Mikihar ko ’alomanay to paysoan no matayalay a hoking, maliyaw haca paini kako, kaira ho no sifo, o matayalay a hoking caay ko mamatelep.

Pasayra ko nengneng no ’alomanay to kanga’ayan no karomikatan a lalan, mipalalan kako to sakatatodong no tamdawan a karomakatan a liyol, miliyas to “kasemseman no romakatay” sanay a tatiihay pangangan.

Mihinatala ko ’alomanay to padama no sifo to sakakahemaw to dadipoten no laloma’an, ato mapadama ko kacango’otan no matayalay a kinairaan, matiniay a demak, o mamisafaloco’ kako to sapisalof.

Militemoh to ikoray, hinatala kita to kakodait no Taywan, manga’ay masongila’ to sakilifong a adada, ono serayan a kari’angan a masamaamaanay a sakalafo, ato sakaranikay mifalic malamaciay, masalof ko matelangay fadahong no loma’ a demak.

Mihinatala kita to cikingtohay a Taywan, misa’icel kako takowan a cirocek to kalaising, mikomod to kasaromaroma a ’icelan, mifenges to kang, ato patireng to “palaonto aci onto cowat po”, micikeroh to finawlan a onto, mapadama ko sakakingtoh hoking a mido’edo a pidemakan, o saka nayar no ’orip a kingtoh ko finawlan no kitakit.

Ikoray a Taywan, patereken ko kasahirahira a parapatanay i taliyol, kasahirahira no finacadan a ponka, milaheci to taliyol a madotoc, ponka madotoc, o sakafangcal no kitakit.

Ikoray a Taywan, o aira ko kasahirahira mocowatay fa’elohay a kicay, maledef ko ticito kakki a sakadademak, nga’ayay saka lalifet ato tosaay sowal a ’icelan, a ira ko ci’icelay kapolongan sapicoker a patadoay rocok, o aira ko masasingodoay malalenay a fafahiyan fa’inayan a taliyol, mapaka’orip i kahacecacecay no finawlan ko salongoc.

Ikoray a Taywan, o ai kasacecay no kingsi, midotoc to katadamaanay macowat, micikeroh to kasaniyaro’ a kinaira, milaheci to “malalenay Taywan” a patosokan, kaicowacowaan manga’ay ko kamaro’, manga’ay malipahak ko tamdamdaw.

Saka enem, Marikec tata’ang ko ’icel, sakadado’edo mapaki’emel ko kitakit.(六、團結力量大，繼續壯大國家)

Polong a finawlan no kitakit, ikoray sakacowat no kitakit, o kahacecay no ’icel. Misi’ayaw to polongan no cikiw, polongan kalalifetan a to’ak i, awaay ko pakoniyah milifet sanay a kitakit, awaay ko misiikeday a syakay a macakat.

Dengan o karikec, itiya mapaneker ko karomakat no mita; masasicokeray, ta maparaaraay ko naripa’an no mita, pakaynien no mako i ’icel no nikapolongan, mirikec to polong no finawlan, mapaki’emel ko kitakit.

Kafana’en no mita, ira ko niyah salongoc ta ira ko kitakit! Midotoc to kimpo no Conghuaminko, ono Conghuaminko a niyah salongoc o nano finawlan mapolong; o cikikaay to no Conghuaminko, o finawlan no Conghuaminko; orasaka manengneng to, Conghuaminko ato Conghuarenmin kapolongan caayay ko masasiniyahay. Kahacecay no tamdaw, karikec, maolah to kitakit; kahacecay a sician kasarekarekad, o mamiliyang to saka’emodaw, midama to niyah a salongoc, aka a sakoniyahay kasarekadan mikinafalah to no niyah a salongoc no kitakit.

Tana ’alomanay kitakit i hekal, miwacay micoker to Taywan sapikihatiya i kasakitakit, mapahapinang itini, o Taywan o nano hekalan ko Taywan, o Taywan o polongan no cikiw sakanga’ay sakacomahad nga’ayay tati’eren paso’elin a ’icel.

Polong no finawlan caay ka sasiiked, cima ko ’ayaway ikoray tayni caay ko hahaenen, dengan o pilecad mikihamon to Taywan, saheto no niyah ato kasakitakit a widang pasowalay to kitakit no niyah, malecad ko kapaloepo. Caayay ko malaliyasay a mararitiriting ko faloco’, mihawak ko ’awas pasayra i hekal!

Saka pito, O Taywan saka fa’eloh no hekal, o hekal saka fa’eloh no Taywan.(七、臺灣新世界，世界新臺灣)

Tana pasayra ko Taywan i hekal a rakat, mihalhal kita to pipasayra no hekal i Taywan. ’Aloman ko fa’elohay maro’ a widang, romaay kitakit a widang, nai kasahekal tayni i Taywan, mitiliday to nano Taywan fa’elohay a tilitilidan. Ahowidan no mita cangra, mingodo kako i tamowanan!

Aniniay a kaitinian, ira tayni ko nai cowacowaay widan no kasakitakit, ira ko minokayay nai roma kitakit a widang, o milaheciay a demakan ko sapicoker to Taywan. Kao fa’edetay ko ko kamay mipi’pi mihamham, miahowid i cangraan.

Anini dadaya, o pataheka no kitakit ko sapihamham cangraan o tada lafang no kitakit, i Taynan ko kaitiraan. I 1624 mihecaan, nai Taynan ko lalowadan no Taywan, miteka pasayra i polong no cikiw ko Taywan. Tomireng i “Taynan 400” likisi a to’ek, o papahapinang to ciso’elinay ko Taywan, ki’emel pasayra i fa’elohay a hekal, o saka pimiham no hekal to fa’elohay Taywan.

Mitahidang kako to kahacecay finawlan no kitakit, mikapot takowanan mipalahad to ina no miso no mako a Taywan malipahak, malakapot ko demak no mita midipot, mipa’edil i cingraan, malo tatakecen no hekal cingra, malo kakangodoen no kasakitakit a tadamaanay kitakit cingra! Ahowiday kita mapolong!