Aniniay romi’ad a likisi

Aniniay romi’ad a likisi - 0509 Misatataday to Taywan yofayof a analal (歷史上的今天——0509獨台會事件)

Ika a pacipatan “Misatataday to Taywan yofayof a analal” a likisi. (歷史紀錄片《末代叛亂犯》電影海報。)

Tona mapalasawad koya “Tongyin kanloan seci linci telekan” i, o nipatatekoan mato caayho ka ta’engad ko romi’ad no Taywan, I 1991 miheca 5 folad 9 romi’ad, ci Liao Weicheng, Chen Zhengran, Wang Xiuhui aci Masao Nikar sasepat, pakayni pisa’osi nangra to tilid ni Shi Ming to “400 mihecaan likisi no Taywan tamdaw”, mala o miliyangay to “Cenci (pitefoc) to mirawraway telek” marepet no mihelamay, saka o nian a demak, saka tatongotongod no finawlan no Taywan miliyang to nikapolongan onto.

1991 miheca 5 folad 1 romi’ad, mipalasawad to “Tongyin kanloan seci linci telekan”, nika o Taywan o caciso’elinay to o nikapolongan ato mapakoniraay haw? so’elinay caayay aca. Itiya, o pipalasawad to “Tongyin kanloan seci linci telekan” a saan, ira ho ko “Cenci (pitefoc) to mirawraway telek”, rikec 100 liyad saka 2 tosir o mamipatala to sapirawraw raraw, mangocedisay a tawa, mipadoedo mikantok to sapakoniraaw no finalan no Taywan.

Nanoya, tona Tsinghua daykako kingkiwsi ci Liao Weicheng (Liāu Uí-thîng), matayalay to ponka tamdaw ci Chen Zhengran (Tân Tsìng-jiân), syakay onto a fafahiyan ci Wang Xiuhui (Ông Siù-huī) aci Masao Nikar sasepat, o pisa’osi nangra to nitilidan ni Shi Ming to “400 mihecaan likisi no Taywan tamdaw” i, mapamotek no Fawopo mihelamay.

1991 miheca 5 folad 9 romi’ad, mihelamay maocor ko papinapina tamdaw misetol to pitilidan no Tsinghua daykako, mirepet cangraan a tamdaw, sacisowal sa o nano nidamaan ni Shi Ming cangra, micowat to Misatataday to Taywan yofayof i Taywan, o mamifelih to “Cenci (pitefoc) to mirawraway telek” saan saka repeten cangra, nano nian a demak, citodongay pacipat to sapisinting a kapah no Lukai tamdaw ci Cegau Drululan, i 5 folad 11 romi’ad repatan mirofo itiya.

Nanoyaan, o nano nisimedan a tilid to “400 mihecaan likisi no Taywan tamdaw”, ala cecay to ko tamdaw tonini a tilid, alatek ’alomanay to ko tamdaw pakanengneng tayra i Dipong ci Shi Mingan, orasaka, ira ko saanay tamdaw, malengat ko micowat to Misatataday to Taywan yofayof i Taywan, so’elin atekak ko demak no Kuomintang, saki macowatay lowad onto no mitiliday a patalaw na saan i, o halaka to piepec to sician ko matiniay.

Pakayni to nian pirepat a demak ranikay sa masasicalay ko kasadaykako, i 5 folad 12 romi’ad, tayra masafeleng ko mitiliday i “Dazhongzhizheng” potal miliyang, talacowa kasafelengan toya romi’ad, ira ko semo’otay miliyangay mitiliday malaplapay no imien ato hitay, pacofcof han padakaw to tosiya mipalaliw, nika matiniay a demak mala sapifelihaw no finawlan, saka micalap to siyataw no cilamalay i Taypi, ato pipalasawad onto to rikec 100 liyad.

1991 miheca 5 folad 15 romi’ad, nai polong kasa niyaro’ mitiliday ato syakay onto dademakay micalap to siyataw no cilamalay i Taypi, o todong pidama micoker to marepetay no Misatataday to Taywan yofayof a tamdaw, onini a picalap a demakan padoedo 6 romi’adan, itini no finawlan a sapenec, i 5 folad 17 romi’ad, Lipoyin kinatolo mihayda palasawad to “Cenci (pitefoc) to mirawraway telek”.

Itiya 5 folad 20 romi’ad, miliyangay finawlan palowad to mifelihay to sici a piepec ’ofadan tamdaw mirakat, miliyas to siyataw no cilamalay i Taypi.

Tahamatini, “Cenci (pitefoc) to mirawraway telek” mapalasawaday to, nika o sasapinangen ho ko “rikec” 100 liyad caayho kademak, orasaka o Misatataday to Taywan yofayof a analal o nian to “rikec” 100 liyad saka 2 todir ko sapipalowad to o mamipatala to sapirawraw ko sapararaw. Nanoya, mapalasawad ko rikec 100 liyad a demak padoedo haca macowat. Tangasa saka tosa miheca 1992 miheca 5 folad 15 romi’ad, Lipoyin kana tolo mihayda “rikec” 100 liyad masalof, pakayni to nian a analal mapasetek to o caayay ko tateleken sato, o Misatataday to Taywan yofayof a demakan katatongotongodan nanoyaan sato paherek.

Manengneng to, o Misatataday to Taywan yofayof a analal mapalowad ko sapipalasawad to “Cenci (pitefoc) to mirawraway telek” ato “rikec” 100 liyad pisalofaw a tadamaanay demak, saki nikapolongan no Taywan ira aca ko talolongay a mafiyol, o Misatataday to Taywan yofayof a miteka paherekan oya  midiwadiway ci Liao Jianhua ko misyasingay likisi pala filomo “Saikoray mifelihay ciraraway a analal”, o piliclican ato patodongan a salicay, malecad to toya nitilidan a cudad, o todong piharatngan minengneng toya to’ek mihecaan mahiratengay ato kimad.

Oroma sato, kasapinangan a demak, o nirakatan no nikapolongan no Taywan, tangasa tonini 30 mihecaan, itiya to masapinang ko kacomahad no nikapolongan, o nian a nisidayan a tilidan, mapatapal kita, caay ko inacilaay ho a demak, nikapolongan, caay ko tangsol sanay ciheci, onini i o dadoedoen no ikoray a tamdaw, padoedo mipadama ato midoedo to nian.