Folo’

Folo’ （kuwaping a sowal: 箭竹）

O roma ko lengaw no folo’ i Taywan, o folo’ pinaloma’ i Taywan tosa ira ko tampo sanay a folo’ ato ’akawangay no Isan a folo’, saheto no palapalaan a molengaw ko folo’, fangcal ko tapangan nira koengel paci’im a molengaw, ano cato pikari’ang a mida’eci cakakari’ang ko ’orip nira, adihay a manengneng masamatini. Itiya ho ko malingaday a tamdaw, o da’eci nira mangaay maala malokakaenen, ma’ikesay to a folo’ mangaay sapifadic to loma’ safangcalay malo sapisaloma’ a lalosidan.

Da’eci “’Amis a ’etal ’adeci han, no Siwkilan da’eci han”, mangangol micedem, caka ’angrer, sakohawen, ciyanen to titi anca dohdoh han maemin mangaay, fangcal sakitatirengan, misasaw to tina’i ato fitoka, mifalah to simal ato ma’oningay malasakafeso.

O malingaday no niyaro’ itiya ho, miala to folo’ sapipatireng to talalokan, ’adipel ato sapitolik to tapila’ fakar, ato talawlaan no wawa, adihay ko sapimaan. Nika macakat to ko kicay, malosapifadic a lalosidan ato sapisanga to lalosidan caayay to piala malowan ito, anini sato deng to piala aca to da’eci nira malokakaenen.

Mida’eci sa ko finacadan marocek ko kaciriko’, nawhan paener ko folo’ maditek, sacitefo’ sa mato talodo’ ka tata’ak, miala sa hakakan sa, mikoyod ho to lofoc, wata ko roray.

Maherek mapanokay ko da’eci, caayay ko sasafaen ko pipodac nira, mato talodo ka tata’ak ko da’eci, ano ca kafana’, hacecacecay han a mitipelak ko podac, tahateloc ya ngangol to awaay to. Orasaka, pakaynien i teloc a mipitek, tata’akay aca a folo’ malo patakecan a miliyon, liyon han koya podac nira, osaw to oya heci to nira, oyanan koya.