Kakorot

Takaray a sowal 概要

O itiniay i papalaan lengaw sanay a kakorot, miming ko heci nira, cecay a heci tolo polo’ tangasa tosa so’ot a kongke ko kareteng nira, matiya o kimolmolay a cangaw faco ato macidemay faco ko podoc no kakorot. Ona mimingay a kakorot mikingarer to tata’ang a kakorot, ira to paratohay no mikiwkiway, oni mimingay a kakorot i, manga’ay miserer to sitang血糖 ato sice血脂。

Maharateng ho no mako i kaemang ho, ano mihakelong to mama ato ina talalotok mikasoy anca talaomah malingad, mara’od to ko safaw cecay tatokian, midateng to kami malakaka i palapalaan, ira ko kakorot, papah no kakorot, sama’, lapat, tatokem, kapayaay ato lokot, mitangtang sa maemin han pacamol misafel, tadakadofahay ko sakalahok niyam. Tenas han to cilah ko kakorot, saaledet sa kaenen, nika meromero han caay kafana’ to kaaledet kaenen, sarara han mikemkem a komaen, itiya mahapinang a kaaledet.

Itini i Pangcah a finacadan, caay ko heci aca ko mikaenan, halo teloc ato papah makaen to, tadaangrer a kaenen, makilatolo ko tata’ak no i palapalaay a kakorot, oya mamangay matiya o cokana, matiya o fita’ol ko terongay, mitiya o kiwli ko tata’akkay, ira ko somowalay to kakorot no i omahay, o kakorot no i lotokay han, tadamakapahay ko cengel nira sakangdaw saan, mikiangrer to mipalomaan a kakorot, nikaorira, lengaw sanay i palapalaan, ca:ay kacifao, ‘aloman ko maolahay a komaen. itini i sepat a folad tangasa i moetep a folad to mihecaan ko kacihecian nira, o tapangan nira maemin manga’ay a kaenen, ira to cecay so’ot to ko likisi nona kakorot a ma’orip, ano lengaw sanay i palapalaan i, aledet a kaenen, nikaorira, ’aloman to ko mipalomaay anini.

Mitangtang 料理 O kakorot no omah ato kalokakorot, caay kalecad ko nipitangtang, ano mangalay to caayay ka'angrer manga’ay cikciken, ta ceno’ han i fadisaw ta ciyanen, manga’ay sakohopicen micikcik ta teli han i lengtong no pingsiyang, ano kamoen sato i tenas han to tawiw anca o cilah ato damdam ko sapitenas, tadakaeso a kaenen. Manga’ay cikciken pacamol han to titi no fafoy, o imsiya, o sowana ato damdam a polong han miciyan, aledet a kaenen, o roma manga’ay pacamolen to fadowac no fafoy ko kakorot no omah, ano caay kaolah komaen to ’angreray ko paro no loma’ a wawa, kimolmolay a haci nira pacamol han to fadowac no fafoy a mitangtang, makakaen ko wawa to aledetay a ’angrer nira. So^elinay o aniniay a tamdaw saheto sakohaw han a mitangtang, ira haca pacamolen to podaw a miciyan, o samanta’ han, maemin ka^eso a kaenen, anini masadak toko ngangan no sinafel no Aims’ i Fantiyen ato i yese, o salakakorot, o omahay a kakorot ato fadowac no fafoy misakohaw. Matatodong a kaenen ko manta’ay a karot i kaciherangan, mahapinga ko ka^eso’ no omahay a kakorot, i kacihecian a foladan, cikciken a mihonhon miicang, manga’ay cefos han to faedetay a nanom a minanom, o maloamid koniyan. Adihay ko“Kokowaciyen”no kakorot no omah, pakaeso’ ko nikaen, caay ko soaw, pakasaepi’ to soeso no tiyad, palasawad to sawarak, mihadeng to lifawa, mifahfah to kietec no tiring. O kakorot no omah ato kakorot o lalomaan cangra, nikaorira, ano marohem to ko heci no kakorot no omah, ciwarak ko heci nira o paeno nira ciwarak to, ano samanta’ a makaen i, maota’ ato mapiyas ko tiyad a adada, sanaw oya kangdaway oh ko heci nira ta manga’ay a makaen.