Kawakawasan ratoh:Ci foting aci Linamay

Ci Foting aci Linamay(福定和里拿邁)

Kinalefoh ci mama(爸爸犧牲自己)

Iya sa ca Calaw Ilikic misakilang cangra, itiya sato maso’aw sato ci Calaw Ilikic papiladom to wawa nira ci Fotongan aci Linamay i tefon no pala, yo palowad cangra hinam han ki’ayawan no mama nangra ci Calaw Ilikic ko nanom no tefon a mingota.

Minokay sato koya malikakaay,

” namimaan sato kamo a miladom” han ni mama nangra.

”mangotaay mama kiya nanom, ira sa caay ka kalamkam kami a mihacol” han nangra ci mama nangra ci Calaw Ilikic.

Ci mama sato nangra sowal sa:” ano masamaan to cadiwen ko ’idoc ato fonos namo a malikaka,ano ira matama namo a mihokhok koya mingotaay a tamdaw i’ aka pasasaen cocokhan (tifekhan) to to ’idoc pata’ han to fonos a mipatay koya mari’angay a mingotaay toya nanom haw”, “litangalen namo a malikaka koya tamdaw haw”

“ hayi” han to noya malakakay a paca’of ko nama a palowad.

Tahira sato i tefon so’elinay ira to mihorihor to nanom a mingota koya tamdaw, itira to a cocokhan to nangra to ’idoc tangsol a mapatay,tangsolen nangra a militangal kina tamdaw ci mama nagra.

Palimo’ot ni ina(媽媽的訓誡)

Minokay sato cangra amalikaka , ”ina ina citafad kami” han nangra a malikaka, hinamhan ca ni ina ci mama nangra,”ci mama kini” han nira koya malikakaay,oya han to ina nangra :

” ano saan aca kamo a malikaka kangayaw, ano maolah kamo to tafad kangayaw a tosaen a fasolan ko tafad namo a malikaka” han ni ina nangra a somowal cangra a malikaka.

Sa faloco’ sato to sapisangayaw cangra a misaliway to lima a romi’ad caay ka koma’en, “ ma’edeng to kita a malikaka” saan, tanam han nangra ko ’ongcoy a mitakilid(miliyon) a mitoor comikay,hinam han masolit(maki'ayaw) ho no ’ongcoy cangra a malikaka.

”ca ho ka’edeng kita a mingayaw” saan cangra a malikaka, misaliway heca cangra a tatosa.

So’elinay tanam sato a mitakilid to ’ongcoy masolit to nangra a malikaka, ”ma’edeng to kita a misaatef ” sato cangra a tatosa,misaatef(misatarakal) to a malikaka, citama’ cangra to malonem, o remes sato noya malonem palohan nangra i feso noya malonem.

Mingayaw a malikaka(兄弟出去獵首)

So’elinay lomowad to cangra a mangayaw tayra i niyaro’ no tao a mifolaw, so’elinay itira to a kowangen nangra a malikaka i tongroh no niyaro’, hinam han mafana’ to koya niyaro’ay a tamdaw, ” ci ’ada kita ” sato a malekal,so’elinay nengneng han to nangra ira to koya malikakaay a ma’araw noya i niyaro’ay a tamdaw,ira sa toorhan no niyaro’ay a tamdaw a mikowang koya malikakaay,oya han to malikakaay milaliw to cangra, oya sa nitatoyan nangra a remes nipaloan i feso patolatola(rasiras) han nangra i lalan koya remes.

Cangra sato a malikakaay tayra i takaraway a sera ta makecor ko ’ada a manengneng, cacorok sa a mifafa malikaka matiya o madoka’ay panengneng to ’ada,malalifet a comikay tayra i cowa ko mama’araw no ’ada a dihif a milimek.

Tangsa itira i misa’atefan nangra a malikakak i kakitiw no lalan pasataliyoliyok han nangra koya remes a mirasiras,iya sato ya mitooray a tamdaw no niyaro’ tahira sato i tatodong niya nisa’atefan niya malikakaay sataliyoliyok saan,

”itini koya tolas noya remes, hinamaw ita” sato a mikilim a mapolong.

Hinam han ma’edeng to a mapolong to a micomod i laloma’ noya ’atef koya mikilimay a tamdaw no niyaro’,matatodong i sefer(tepoc) han to nangra koya calay a ’oway noya ’atef, itira to a  tepek han to no ’atef a mapatay koya tamdaw no niyaro’.

Iya sato a malikakaay militangal to fongoh, hinam han ko no kaka a patadekan o fokeloh,ono safa saan a patadekan o kilang kono nira, orasaka caay ka ngicih ko fonos no safa, lakamkam heca a militangal, saheto han nira ko fangcalay a tamdaw.ya maherek sato ko safa, ono kaka saan a fonos mangicih, orasaka caay ka lakamkam a militangal, itira to a padangen no safa a militangal ta lakamkam to a maherek.

Miala to malo'onoc a kilang(兄弟去砍樹當扁擔)

Cangra sato a malikaka miala to ’onoc, oya han no kaka nialaan a ’onoc o talofilof hananay a lomaingay kilang, kahenayay a mapitek. Ono safa saan mitengil ho to soni no ’ayam,”ta’ciw la’olaw, ta’ciw la’olaw” saan a masoni, orira sa soni ko patatodeng han nira a tayra, so’elinay ira ko la’olaw a kilang itira, oriraan a kilang ko nialaan nira a malo’onoc nira.O kaka han to ”mapitek kono mako a ’onoc, icowaay kiso a miala tono miso a ’onoc, ora caay ka pitek” han to nira ko safa nira.

O safa sato nira sowal saan:”tengil han ko soni no ta’ciw la’olaw, ta’ciw la’olaw”, do’edo han koya soni kaitira a miala to ’onoc nomiso” han to no safa nira a somowal ko kaka ningra.

”hayi” sa to ko kaka

So’elinay ira to ko kaka nira namiala to ’onoc to la’olaw a kilang malo’onoc, ora sato a malikakaay milikakawa to cangra to tafad nangra a malikaka, minokay to cangra a malikaka, tahira i loma’ i ciinaan nangra.

Tahira sato i loma’ nangra, ”ina ina celaken to ko fasolan, ini to kami a minokay” han nangra ci ina nangra, hinam han ko sowal no ina nangra, ”malimaan ko tafad namo,na’ay, ma’osi kako” han to no ina nangra a mapoi’, oya sato a malikakaay ”nao samatini saan mapoi’ ci ina nomita, ano hatira i, a miala kita to fafahi nomita” saan to cangra a masasowal.

Miala to fafahi kina malikakaay(兄弟要娶老婆)

So’elinay hinam sato manengneng nangra kiya mami’ i pala, oya sa kaka ”onian ko mako o malohemay” saan to safa nira,itiya to peco’ han to ni kaka ningra,tangsol han nira a mipoci’(podac), hinam han ca ira ko tamdaw o mato’asay aca i laloma’ no mami’, o ngiha’ ningra ono malitengay a malihaway a ngiha’ malofafahi no kaka kinian.

Ono safa saan, o kandaway ho kono safa a nipeco’an a mami’,itira a poci’ han o salonganay a limecedan kono safa a fafahi.