Limecedan no Pangcah
Limecedan no Pangcah （阿美族的少女）
Itini i kasafinacadan takarakaraw ko tatirengan no limecedan no Pangcah, o mafana’ay a romadiw ato kero’ a masafelaway. Nano kaemangan damsay malalokay a matayal, maratar to dafak miradom, mifaca’, misakaranam, malepon konini tatayalen aca no loma’, to romi’ad i talariyar micekiw, mirengos tono riyar, anca talalotok maomah, pakaen to kolong, tahakakerem to ko romi’ad ta minokay, tangsol to misakalafi sapakalafi to mato’asay.
Maraod to ko katatodongan no mihecan ko limecedan no Pangcah, ira to ko kahemekan malotatodong, maedeng to ko kalalacal, malacecay to ko faloco’ ano saan, misafaloco’ to sakararamod. Sa honihoni sato tayra i loma’ no fa’inayan a mitapi’, mipadang miasik to salawacan no loma’, mipadang a miradom, masakaranam, pacafay to mato’asay. O roma i, ano o kapah ko maolahay toya limecadan i, tayra i loma’ no fafahiyan a pakasoy, kaliwmahan mipadang malingad, tadafa’inayan kako anosa talalotok midongec pakaolah to mato’asay no fafahiyan, onini koya sowal ano mamikadafo to ko limecedan a kaying, o rarakaten konini a demak.
Itiya ho o kato’asan a talihocan no limecedan i niyaro, ano palecad han to aniniay i tokay ma’orip a limecedan, wata ko kasasiroma. nika oya nano kakaemangan, ya damsayay lipahakay malalokay a matayal fangcalay nano rayray manengneng i tatirengan no limecedan no Pangcah. Caay ko sasafaen ko maro’ay i tokay ko aniniay a limecedan no Pangcah, teked sa cacay tayni tona falohay a talihocan a milifet a matayal, mi’em’em to ’ilol miliyas to niyaro’, milifet ho minanam to ’orip itini i tokay. So’elin to malalok cangra matayal, o roray koni caay kasaan, pacena’an makakaleto ko tao misalama, cangra sa, palasawad sa to pahanhanan, nanam sato a matayal, ano mimimiming ko lifon, o faloco’ sapifalicaw to ’orip no loma’ i niyaro, o roray koni caay kasaan hadidi sa to roray cangra.
Pi’arawan to lakaw mikawit
- 李景崇，1998，《阿美族歷史》，臺北：師大書苑。
- 達西烏拉彎‧畢馬，2001，《臺灣的原住民 : 阿美族》，臺北：臺原。
- 林淳毅，2001，《阿美族傳說：邦查的山海故事，後山的美麗傳奇》，臺中：晨星。
- 達西烏拉彎畢馬，2003，《阿美族神話與傳說：再創生、彩虹的傳說、人頭祭、鍬與刀、製陶的口傳故事》，臺中：晨星。
- 黄宣衞，2008，《阿美族》，臺北：三民。