Misacepo'
Misacepo' (海祭)
mikawitMisacepo', Mikesi’, Milaedis,（海祭、河祭）
Mipacakat mita'ong ko kakitaan no niyaro' o tomok, pasawal sa...
“Waw…, Malatawaw! tayniay kami anini. Itini i riyar, loma' no miso, nanay pafelien kami to iraay a allan niyam, adihayen ko paini i tamiyan. Saka, itini kami a pacakat to sapakaen i tisowanan, layapen kaenen ko paini niyam to toron, ’icep ato epah, ta malasang to kamo. Tengilen ko sowal no mama no kapah, o kakitaan no niyaro o tomok, todong pacakat no finawlan no niyaro’, saka, itini kami a mi'aray tisowanan malataw, ta fangcal ko piala niyam to kakaenen niyam tonini a riyar, dipoten ko tayniay a cekiway, mifotingay micelemay, mitafokoday, patikeday mialaay to kakaenen a tamdaw i tamowanan, sanga'ayen parihadayen ko mialaay to kakaenen, pafelien ko mialaay to malo sapakaen to laloma’an a wawa ato saka'orip niyam saka, miaray i tisowanan. Kafecol to, kalasang to kamo. Waw…”
Paso’elin ko ’Amis a tamdaw to yo’as o milakecay to riyar, orasaka o piahowid to nano pidipot to to’as no riyar a kawas patalahekal nai riyar saka ira ko pisacepo’ a isin. Matiniay pisacepo’ a lisin, o pahapinangay to lekakawa no finacadan a saka’orip ato pingodo to kasahirahira no tataparan. Mitolon to sakadofah no piniala ato saka rihaday a mifoting.
Ono Cikasoan a ’Amis a sowal Milaedis han ko sowal, no pasawaliay a ’Amis Misacepo’ han ko sowal, no katimolay a ’Amis Mikesi’ han ko sowal, o mililisay to Tarawadaw a ’alo a ’Amis Komoris han ko sowal, saka o kasasiroma to no niyaro’ a sowal. Sapidemak to nian a lisin to pisacepo’, i ’ayaw no kailisinan k pidemakan, nikawrira kasa niyaro’ caay kalecad ko romi’ad, salongan itira i saka 6 folad tangasa saka 8 folad. Kaitiraan ’aro no niyaro’ k kasasiroma, ira to ko i riyaray a pisacepo’ ano eca i ’aloay a pikomoris.
O pisacepo’ no ’Amis a tamdaw o piahowid to kawas no riyar ato kawas no kakarayan ato sera, nawhani paso’elin ko ’Amis a tamdaw ira ko kasahirahira a kawas maparocek itini i tataparan, orasaka mingodo cangra to tataparan, nanay to mihecahecaan ci nialaay to kadofahay a foting ato ’afar.
I pisacepo’an no niyaro’ caay ka nga’ay mikihatiya ko fafahiyan, o nano rocok n to’as ano mikihatiya ko fafahiyan to pisacepo’an i, malo sakacaay pakaala to foting ano masadak a mifoting saan.
Sa’ayaway, o kapah no niyaro’ miala to nifotingan patili i palo’, o mama no kapah ko itiraay i riyar, o kakitaan no niyaro’ ko citodongay pacakat a mita’ong, mifetir to ’epah, mitolon to pidipot a ciniala to foting ato mamaala i riyar, manga’asy kadofah ko pinaloma ato pilitod ato rihaday ko finawlan no niyaro’. (Mingitangit to malataw, to’as no niyaro’ midipot to finawlan no niyaro’, ano tara riyar to, tala’alo to a mifoting, talalotok to maomah miala to sakairaaw rihaday minokay.)
O kakitaan no niyaro’ mikerid to finawlan pacakat a mita’ong to to’as, i pisacepo’an pahapinang to mingodoay to kasato’as a tadamaanay ponka, pisacepo’an pasadak ko mama no kapah to todong sapacakat, o ’epah ko sapafetir mita’ong to malataw, sato o kasaselal a kapah ko midefongay i riyar (’alo) pisatapangan a mifoting, o nian ko tatapangan no pisacepo’ hananay.
Pakayni i pisacopo’ a lisin a nengnengen i, midotoc ko kapah no ’Amis nai kasaselal a madadoedo i kasakakakaka tangasa i telocay a selal, pahapinang to masasingodoay to kasakaka, kasa selaselal masasilifet, minengneng ko mato’asay to nialaan no kasaselal, inanengay a selal i pakaolahen, o marowi’ay a selal i tefocen, mialaan a foting i, o sapakaen to mato’asay, nanoya minengneng to nga’ayay tadacaayay foting ko sapisilsil, nai mato’asay tangasa i kasararem mapakilac.
Sakakaay selal ci’osaw to nikaenan pafelien ko kararem, masamatira a pasirarem ko paini, caay pilaom to kakaenan. Matiniay a lekakawa no ’Amis a finacadan caay ka sawad tangasa anini.