Misacepo’

Misacepo’ （海祭）

“Misacepo’ ”hananay no Pangcah, no Saetip a Pangcah miladis han, no Pasawali i misacepo’ han, no Falangaw i mikesi’ han.

O sowal to “ misacepo’” sanay itiniay i Fakong no Kalingko niyaro’ no Makotaay sowal sa tonian, “ Nano ratoh a sowal, na itiraay i Nang-yan ko Pangcah, icowaay a pala awaay to ko mafanaay, nawhani na mico’a’ang to misangaay a kawas, matefoc no kawas sa palenlen han nira a mihadefek. Deng to ya tatosaay malekakaay madipot no riyar a kawas sa mapawpaw tahira toni kanatal no Taywan, saka manga’ay to nangra itini parayray to teloc. Oni na mapawpaway milakecay a tato’asan no Pangcah, o piaray no faloco’ to pidipot no riyar a kawas, saka maraod to koya paherekan talahekal a romi’ad, misalisin to toya kawas no riyar ”.

O roma i,.mingataay to riyar ko niyaro’ no Makotaay, mikiriyaray ko ’orip no niyaro’ a .tamdaw. O lalowadan to pisacepo’ a demak, o pinanay ato palemed to pacefongay a mifoting ko makadofah ko pifoting a tamdaw no niyaro’, ta fangcal to ko pinokay a paherek, onini i o patalahekal to ’icel no mikilotokay mikiriyaray a ma’orip a pinangan no serangawan koni, roma i o papinang to kalacecay no karikec ato kalacecay a ma’orip. I’ayaw no pacefong, polong a kapah no niyaro’ masa’opo i taloan, o mato’asay no finacadan, o citanengay a tamdaw pakafana’ to saiasalil a mifoting, ato pakafana’ to ano tata’ak ko tapelik no riyal samanen a mifoting sanay a tanmeng. Mikapotay to pisacepo’ saheto o kasaselal a tamdaw, marapot ko mato’asay, sasifo’an ato kapah, tati’ih mingata ko fafahiyan ato mikapot, i’ayaw no pisacepo’an a dadaya pacefong to a mifoting, malo sapato’aya to kawas no riyar, pakilacen ko finawlan mapolong a komaen.