Niiyaro’ no Ciwkangan

Niiyaro’ no Ciwkangan （長光部落）

Aloman ko mafokilay a tamdaw itini i pasawali mililisay to riyar ira ko sakakahad sanay masa’apilisay a omah, mangalef caay kafana’ itira tora katatongodan masadafdafay ato ’apilis a omah, makadofa ira ko tadamaanay nasidayan no to’as ho a lalosidan, orasaka, ano paka’araw kiso to niyaro’ no ciwkangan, o malemeday ko maro’ay toni a niyaro’ sa ko faloco’ iso, nawhani, o lalan nai pangcah sa moecel sa talawali tangasa i riyar, o loma’ maemin ira ko potal, o laloma’ mapateli to masamaanay telangan a lalosidan no to’as ho sapa’eres to laloma’.

Minokay malingad malacecay malafai, matiniay a ’orip edeng itini i Kakacawan niyaro’ no Ciwkangan, onini koya tadakalimelaan no widang tayni a misalama. itini i niyaro’ ira ko pisalamaan i papotal a komaen, onini ko sakacifaloco’ ko tamdaw sapitilidan tona malemeday a romi’ad, roma i tayra saetip no niyaro’ omaomahan misasing, minengneng to na rorayan no mato’asay a milingad toni a omah to mihecahecaan.

Itira i lalan a romakat tadamahapinang ko ka’apilis no facal, makafana to mamakadofah ko kinaira tona miheca, nawhani kakahad ira ko lotok, nengneng han ko loma’ no niyaro’ mato tatoediedip sa, seriwseriw sa ko fali nairiyaray sataota’ong sa ko widawidan no panay, masa awa ko fao mikari’ang safangcal sa ko panay.

Ira ko somowalay, o salawacan no ciwkangan pasietip han mitapal ira ko lotok, kalotongan han ko ngangan nira, pasiwali han sakangdaw sa masa’apilis ko omah sangaay sa ko fali haphapen...., soelin to pakacecayay to a ofad ko mihecaan ira to ko mafana’ay toni a niyaro’, nawhani na ira ko tamdaw no ni a Taywan, itini no misimsiman nangra a paniyaro itini.

Ano faede’edet katalawan ko romi’ad itini, nika o fali saheto nai waliay no riyar saka sasa’emel sa, tapal han ko kakarayang no Tay-pin-yang, mato kasaengeran no fali a pahanhan. Ira ko cecay kaolahan no tamdaw a romadiw, nisanga’an no fafakian ci Angay o itiniay i Ciwkangan a tamdaw, o makapahay paniyaro’an ko Ciwkangan, sepatay a rowis kasaserep nonini a niyaro’, ira ko sawali, pa’enoan, pangcah ato no’etipan ko lalan, toladay o tayal mikangkang i facafacalan, o roma talalotok a midongec, tala’alo a mikalang, minokay to hakakerem enemay ko toki, maherek a malafi misafaloco’ to sapitafokod. roma i misafaloco’ to sapicekiw, itini tona radiw tadamahapinang ko nika fangcal noni a niyaro’.