O Demo no yin-cu-ming

Pakayniay toya O Demo no yin-cu-ming (kuwaping a sowal: 原住民民主運動) hananay a sasowalen haw i, ma’emin nima ko kakidaten a somowal. O kapolongan no tahaf no kakarayan konini a tosok toya ‘Democracy movement’ hananay no Padaka a sowal to「民主運動」. Awaay ko no Pangcah a madahcongay a sowal toya Democracy movement. Nikawrira, manga’ayto a caliw han ko sowal no Padaka a Dimokrasi, ano ^ca i, Dimo han haw i fangcalto, o cecay no pisanga’ to faelohay a sowal.

O sasowalen a mikidat to Democracy / Dimo haw i, O maan ko Dimo hananay? O maan ko lalengatan aira ko demak to Dimo? Pakayi i likisi haw i, maedeng kita a mafana’ tonini a Dimo hananay. Tinako saan, nawiro mapalit no Katimolay a Afolika ci Nelson Mandela to 26 a mihaca i pirofoan, nawiro kowangen no mari’angay ci Luther Martin King foksi, nawiro paliten no Syi-fu no Miyamar(緬甸) ci Aung San Suu Kyi, o kakeridan no micoliay to tatiihay a cisakowanay a fafahiyan ciira. O romasato, o maan ko sakaci’icel no Indian no Kanada a o ‘First Nation’ (o tatodong nonini a sowal i, o tadatamdaw nonini a sofal no Kanada saanay) kami a saan a patikowal i tahaf no hekal?! O maan haca, onini a Democracy movement, o caayaya ko mamafilo a ’icel no malacecayaya a finawlan.

O patinakoay a sowal ko pikidat to likisi a somowal to pakayniay i demak ni Mandela, ni King hakasi, ni Aung ato Indian no Kanada. O sakasaan a somowal i cairan haw i, o nai Dimo a demak ko sakacingangan naira i kasakitakit. Nawiro macodah canira a midemak to Dimo asa kita a milicay, mipacoliay canira to tatiih no cisakowanay no kitakit, nawhani, caay ka rayas, caay pilalen, caay ka mu^cel ko demak no malatapangay no niyaro’, ato misakakinih to pakoyoc ato mipaekel to awaayay ko pitadi’ecan a finawlan. Orasaka, patikowal canira to naifaloco’ay naira to nipafaloco’an no caayay ka’araw a ’icel, mato pali’ayaway to sowal no Israil(prophet) a niyaro ko midemakan naira. O cecay no kinafalah to ’orip to pidemak to Dimo.

Itini i Taywan haw i, nairato ko tatinakoan to piDimo to patikowal, pakaynien to patikowal a mitoro’ to tatiih no syi-fu, ato pasadak to milongocan no finawlan i syi-fu. Hatiniayto a tood haw i, miDimo ko Pangcah no Taywan to patikolen ko sera niyam, patikolen ko ngangan no nano to’as niyam, ato kalo ngangan no kalo pala, ato lotok ato ’alo haca. Patikolen ko sowal no niyam, kangodoen ko sa’ayaway a tamdaw no Taywan a Pangcah saanay a tikowal haw i, o cecay no lalan a pasowal to cisakowanay to nika fukil ato nika fula naira.

O piDimo no Pangcah i, o micaliw to fana’ no citanengay to rikec, ci fenekay to sakowan, ciharatengay to sapisaniyaro’, ato iraay ko singko a mu^cealay ko faloco’ a tamdaw. Mikapot ko foksi no kyokay, singsi no daykak, ato mapadang haca no paka mediaay a pasinfon ato pakatilifi, ato kakalimelaan haca haw i, o pilonok a kalacecay no Pangcah ao ci’edilay a kahemekan kami o Pangcah saanay a faloco’. O Dimo haw i, o cecay no pipasadak to longoc no finawlan to caayay pimelang, awaay ko epoc a kakeridan no kitakit. O sapacekil to nikafula no sakakaay no niyaro’ ko piDimo.

Pi'arawan to lakaw

• 星歐拉姆. (2011). Wikipedia 維基百科 族語詞條試寫─原住民族語詞條 2011作品集. 教育部.