O malitengay to a fafahiyan

o malitengay to a fafahiyan （成年女子）

Mikapot ko fa’inayan to selal nga, malakapahay ko tireng nira, o miselalay to a fa’inayay cira; pakayni i to’as no tireng i, o kapah hananay a mipangangan; ano pakayni i taneng ato ’icel nira i finawlan i, o masamato’asay hananay a pangangan. Namiselal tahira i mamacakat to masaselal i, ira ko miselal, kapah, masamato’asay hananay a ngangan, o mamiinorong to tatayalen no niyaro’. Malakapah ko fa’inayan i, ira to ko ’imar nira, nga’ayay to a mikadafo ato mihadotoc, o roma sa to i, nga’ayay misawkit to dafong, mikihatiya to lisin, mi’adop, ato mikonling ato mi’ocol to pakarongay; o inorong nira i, o mamidemak to kalotatayalen no niyaro’, awaay ko lifong no nini a tayal, pitoay a miheca ko pitayal, ano ira sa ko kacangot no kapolongan to payci/pida i, o mamipadama haca masasolot to pida, ya pikorkor, pipatireng, pisanga’ to to lalan ato amekang, awaay ko lifong; oya sapilisin a pida ato sapihamham to lafang i sefi a payci/pida i, oya cakat sanay ho malakapahay ko mamipahadak(o pinangan no cacokaymasen i kapolongan a demak a payci i, ano pasadaken sa i, oya cipayciay no kasaselal a tamdaw ko mamipacaliway, oya micaliway i, mitayal to tatayalen noya mipacaliway ko sapatikol nira.) Ona nikimadan a maemin i, cowa katatodong to kalokay^ing no fafahiyan, awaay ko tatayalen no fafahiyan to kalodemak no kapolongan, hay o roma ko tireng no fafahiyan to fa’inayan, dengan o piala to fa’inay, mahofoc a to pahafay to wawa, mihadotoc to dafong no loma’ ko tatodong no fafahiyan.

Pakayniay i mihecaan ato tireng a mihapinang to kalokay^ing no fafahiyan no ’Amis, hatira to metmet han ko kamay a kata’angay no coco no fafahiyan, ato tahira to ko mihecaan sa na, o mato’asay to, o kay^ing/limecedan hananay a pangangan. I loma’ i, nga’ayay to a sifa’inay, mihatodoc to dafong; i niyaro’ i, nga’ayay mikotay to fa’inayan a matayal to demak no kapolongan, ka cowa kanga’ay a mikapot to kayki o kapolongan.

O pinangan i finawlan no ’Amis i, mialaay ko fafahiyan to fa’inay, mihadotocay ato misolimetay to dafong no loma’, awaay ko tatodong no fa’inayan. O demak no papotalay nga, o fa’inayan ko mamidemak, mansa cowa kanga’ay ko fafahiyan a mipapising a mikapot to kapolongan a kayki, cowa kanga’ay a malakakitaan no niyaro’, ato mamipaliwal to dafong i, ano awa ko loma’ay ato fa’inay a mipapising a pawacay i, awaay ko ’osi nora pipaliwal.

Pi’arawan to lakaw

• 台灣原住民族歷史語言文化大辭典
• 李景崇，1998，《阿美族歷史》，臺北：師大書苑。
• 黄宣衞，2008，《阿美族》，臺北：三民。
• 達西烏拉彎‧畢馬，2001，《臺灣的原住民 : 阿美族》，臺北：臺原。