Wu feng

Wu feng-1231 Pitastas to fodawan ni Wu feng.(拆除吳鳳銅像事件)

Pitastas to fodawan ni Wu feng[1]. I 1988 miheca 12 folad 31 romi’ad i Ciayisi no Taywan, nawhani macangal to nika halafin no Conghuaminko a misinting to palakawas ci Wufeng, miepec to yincumin, papinapina a kapah no Co finacadan mitastas to fodawan ni Wufwng i Ciayisi. Pakayni tonini a demak, Conghuaminko kiwikopo miketon paterep i p[itilidan to pipasifana’ to pakayniay kimad ni Wufeng, saan o Wufengsiang mafalic ko pangangan Alisansian han to. Pakayni tonini mapalowad to ko piharatengan to saki 228 a ’otoc itiya.

Paikoran (背景)

Pipalakawas ci Wufengan, itini ho ci Wufeng i no Mancin a to’ec o citodongay dademak no Alisan, mipalasawad to mangayaway a lekakawa mikinafalah to tireng, saka pacekil ko nanodemak ni Wufeng, nanoyaan caay to pingayaw ko yincumin no Alisan saan.

Itini sato o Dipong a to’ec i, itini pitilidan misitapang to pasifana’ to kimad ni Wufeng. 1949 mihecaan na tayni i Taywan ko kominsifo i, matira to ko pipasifana’ no pitilidan tonini a kimad, itini i Ciayinsin Alisan a sa’etal panganganen to Wufengsiang. O kakeridan no Taywansen ni Qiu Chuanghuan a to’ec, mipadadahal to samiyay ni Wufeng ato patademan, itira i ka’ayaw syataw no kisya i Ciayi patireng to fodawan ni Wu feng. Orasaka o itiraay i Alisan a Co finacadan halafin ko kahinapecan to mangahay to pakayniay kimad ni Wufeng, misanga’ to caayay ko fangcalay ko pipatodong to mingayaway a demak, o saka epec ato misawacoay i nangraan to ponka no niyaro’.

1987 miheca, ira ko demak to pakayniay ci Tang Yinsen. O kapah no Co finacadan ci Tang Yinsen, tayra i Taypi matayal, malaliyang to tawki, o kaforawan sa mipatay to tamdaw. o hakasi ci Jiang Xun aci Hu Taili mikihar patado itiya ci Tang Yinsenan, nanay o sifo mipalasawad to raraw ni Tang Yinsen. Nikawrira pakayni tonini a demak mafiyol ko hakasi masasowal to pakayniay to pisakawas ci Wufengan o saka piepec to Co a finacadan. Toya miheca 9 folad 9 romi’ad, palowad ko Co finacadan mirarakat milongoc to sapifalic to Wufeng a ngangan.

Pakayraan to demak (事件經過)

I 1988 miheca, Taywan Kristo ciwlo kiwkay foksi ci Lin Zongzheng a papinapina tamdaw itira i Taynan minanam ko Yusan singkakoyin a mitiliday to saka 9 lekad URM pinanam, paherek ko pinanam masasowal to samaanen ko pilaheci to ninanaman sato, saikoray miketon to sapi tastasaw to itiraay i ka’ayaway no kisya i Ciayin ni Wufeng a fodawan. Saka i 12 folad 31 romi’ad, ci Lin Zongzheng ato Co fuinacadan a kapah ci Zeng Junren, Pan Jian'er aci Kavas Takistaulan Iwatan a finacadan, micaliw to sintinsya no Taynan Mincintangpo to tosaay paliding, parakaten tayra i Ciayinsi, misatatas mitastas to fodawan ni Wufeng.

Pakayni tonini a demak mapacekok ko imeng no Ciayinsi, tayra a milalang, laplapen cangra. Oya nilaplapan a kapah no yincumin, ma’aca to towaso ato mararay sarosaros, itiya kalahokan sakina 2 ko demak mitastas, oya paliding to ko mitarohay mitefad toya fodawan. Oya fodawan mapolin i sasera tangsolay mapela’ macikcik.

Masatapasng to ko imemeng no Ciayici, saka ’aloman to ko cimadoka’ay no mikihatiyaay a miliyang, tinako mikihatiyaay miliyang a kapah no Iwatan ci Kavas Takistaulan, maketong ko tosa fadowac, o tatihiay a fotol mapela’. Marepet no imeng ko sasepatay a kapah, miliyang ko ’alomanay a tamdaw i papotal no imeng. Saikoray pakayni i dayhiw onano Mincocinpotang Siokiyin ci Huang Zhaokai tayra i imengan a kasaowalan, itiya mapasadak koya marepetay a kapah, oya miliyangay i papotal a ’alomanay a tamdaw maliwasak to itiya.

I 1989 miheca 2 folad 11 romi’ad i, oya miliclicay i Ciayi piliclican ci Chen Zhongying mipalita haca ca Lin Zongzheng, Zeng Junren, Pan Jianer aci Kavas Takistaulan a sasepat, nanoya tangsolan mirepet, omi “kari’angay to lalosidan no kapolongan”, “Micaraay to sakanga’ay no finawlan”, “Miliyangay to kasa’opoan a rikec”, “Mirawraway to komiying” saan ko pipalowad to raraw. Oya Taywan Kristo ciwlo kiwkay Taynan kiwkay ci Lu Junyi ato papinapina a foksi tayra miliso’ i pirofoan cangraan. O piliclican romi’ad itiya, o sito no Yusan sinkakoyin ci Kavas Takistaulan paci’eci sa misano Iwatan finacadan a sowal ko pipaca’of to piliclican, saka mitahidang ko hoyin to mamihongyako to Iwatan a sowal, sa mapalowad i hoyin no Taywan ko sowal no Yincumin i Taywan a patilidan[1].  

O piharatengan to 228 a demak, oya ca Chen Yongxing ising aci Zheng Nanrong a nisakapotan to “228 mo^cel karihaday yofayof” mitelek, I 1989 miheca 2 folad 28 romi’ad masasiiked i kilongsi ato Ciayisi midemak to pirarakat. O Caiyisi a onto kasakapot mitahidang to i niyaro’ay no Alisan a Co a finacadan, nanay cangra itiya toya romi’ad mikihatiya to pirarakat i Caiyisi, o sapicokeraw toya sasepatay a tamdaw.  

O sifo sato, o saka ca’eaw ka tata’ang no demak itiya, mitelek to sapipasadak toya sasepatasy tamdaw. I 2 folad 15 romi’ad, Taywansio kakeridan ci Qiu Chuanghuan mihapiw nai 1989 miheca 3 folad 1 romi’ad miteka, oya Wufengsiang falicen o Alisansian hanto sato. O sakakaay midemakay to kiwiko a kakeridan ci Mao Gaowen mihapiw cingra, toyaan miheca 7 folad 1 romi’ad ikoray a sapasifana’ a tilid pakayniay to ni Wufeng a kimad palasawaden to saan. Oya sato miliclican no hoying a sasepatay awaay to ko raraw a mapalafac to, saka pakayniay tonini a demak, itini sato paherek.  

Rarikoray (後續)

Tona mitastas to fodawan ni Wu feng, o nisafaloco’an no Mincucinpotang manga’ay patirengen itini ko fodawang no 228 a piharatengan saan. o Congko komintang oya Laionhuy ka cingangan, oya pipatirengan to fodawan ni Wufeng patireng han to sakarihaday a sakeling sato.

1989 2 folad 28 romi’ad, oya pirarakat i Ciayisi, o mamipatala kaitiraan noya fodawan pakamaro’en ko linci to 228 piharatengan. Oya sato a imeng no Caiyisi misanga’ to tamdawan ’adipel, misi’ayaw to finawlan. Saikoray o kakeridan siciw no Caiyisi ci Zhang Boya masadak misi’ayaw to miliyangay a finawlan a masasowal, mihayda ko Caiyisi itira i Mituo lalan patireng to 228 piharatengan.

Oya pinapeleng a fodawan ni Wufeng caay ko kafana’an talacowaay to. Oya kaitiraan o Laion huy ko pateliay to sakarihaday a sakeling.

Coyakoay (註釋)

1.少年台灣史-第276頁，周婉窈，台北:玉山出版社

2.走上街頭，台灣牧者傳奇林宗正 （頁面存檔備份，存於網際網路檔案館），邱斐顯，第四屆北台文史與資產保存學術研討會

Pinengnengan to tilid (參考文獻)

1.改變歷史的一剎那

2.那個時代：戒嚴時代…座談會紀錄（頁面存檔備份，存於網際網路檔案館），鄭南榕紀念館

3.林哲夫 (2018) 【民報】URM來台走非暴力的路 （頁面存檔備份，存於網際網路檔案館）