Mi'edaw

Mi'edaw竹占

Itiya ho, o ’Amis finacadan a tamdaw o kalomaamaan saheto iraay ko salo’afang saan, o nia caayay ko ’araw no tamdaw a kawakawas, pakayni i nipili’an ano eca citodongay malalicay a tamdaw, ko mamipalalan a pa’olid ano eca paratohay to nafaloco’an, pakaynien i pi’edaw ano eca pakayni i kasairaira a pipa’edap. O maan ko pi’edaw, alatek aniniay a kapahay tamdaw mafokil ito o maan ko pi’edaw? anini sato awa:ay to maaraw to mita ko matiniay a demak i niyaro’. O pi’edaw hananay, o ’aol ko kahapinangan pasetek, mafan’ to ikoray a fangcalay ato mari'angay a demak. Tinako, o adadaay a tamdaw, o ngasawan, omalinaay ato maemin a demakan no niyaro’, matiya o kailisinan to, masayir to, ma’emin manga’ay pakayni to pi’edaw hananay mareko ko demak.

O aniniay a siyakay i, ira haca ko ’Amis a tamdaw miterekay midemak ato sapirocokaw to pi’edaw., talacowa mafalifalic ko kasolek no siyakay ato kasasiroma to no saki’orip, alatek ira ko sakangilayaw to ponka no Yencomin, nikaorira, o ’alomanay a ’Amis finacadan ’Amis a tamdaw i, matoor midodo’ ho ko nato’asan a serangawan, saka anini midemak to pi’edaw.

Pahecian no pi’edaw竹占功能

Tahamitini i niyaro’ no ’Amis, o sapi’edaw malopinengnengan tadamaanay a pinangan no ponka ato tadamaanay a sakadademak. itini i pipa'edawan, patalomaan, kalipahakan ato masamaanay a demakan i, ira ho ko mi’edaway ato Paseneng toni ’edaw, patalahekal tona to’asan ato parayray koni a demak.

Parafas a sowal補充

Ira ko sowal nomato’asay to pakayniay to kaciwawa no mararamoday. Patinako, o ’Amis finacadan a tamdaw, saheto o kalawawaay, ci wawa saan, ira ko 8, 10, 12 ko ka’aloman ko kaciwawa, o milenakay to teloc no finacadan ahan ko sowal. Nikawrira ira ko mararamoday sa ciwawa saan i, cecay aca, samaamaanen noya mararamoday a micorek i kalahokan, misalafii, cecay sa a cecay ko kaciwawa, ira ko sowal no mato’asay to matiniay a kaciwawa “Mato tingas no ’edaw”. Saan ko pipalasafa, mi’epec to matiniay. Mi’edaw sa ko mi’edaway misotasot mitaroh itiya, malafot koya sapi’edaw, ira ko cecay o dengan macekakay a macidemay (masatingas), o nian ko patinako no mato’asay to cecayay ko kaciwawa no mararamoday.

Tadamaanay ko pipangangabn命名重要性

Itiya ho o tengil no mako ci faian no mako to mi’edaw hananay a demak, ano mahofon ko fafahiyan to wawa i, mipangangan to wawa, paytemek sa to kaolahan a ngangan mipangangan, roma mipangangan to no fakiay a ngangan, o roma anoi kahacowaan ko kahofocan no wawa i, tinako i kacanglahan, kalahokan mahofoc, pangangan han ci Canglah anca ci Lahak han ko ngangan, nikaorira, ano caay ka tama ko pipangangan haw i, kalaadada kora wawa. Sowal sa ko fai no mako, mitiya o ali nira, iayaw yamahofoc to wawa cingra, mapangangan to nira koya wawa, paka ci Tomay han nira a pangangan, nika mahofoc sato koya wawa, kalaadda ci Tomay, tahira to tosa a mihecaan ko kaadada ni Tomay, tona tosa a mihecaan honi honi panengneng to ising, talacowacowa mipaising caay kanga’ay, roma i, miniwing aca i paisingan, nikaorira, caay kanga’ay ko tatirengan nira, panokay han to nangra kora wawa. Tahaloma’ sato i, sowal han ni fai ko ali nira, amatira aca manga’ay padangen ako kiso midipot ci Tomayan, samaanen ni fai midipot ci Tomay, tanotangic sa ci Tomay, to romi’ad to dadaya tomangic, macahiw i, mafecal i, saromi’ami’ad sa tomangic, masamanay kona wawa sa kako i tiyaho, nanoyanan sato pakonira han to no mama ato no ina nira, siday han nira itini i tamiyanan.

Pa’edaw竹占算命

Saka sowal sakoya wina ni fai, i niyaro’ no mita ira ko cecay a tamdaw ci Sera ko ngangan nira, mafana’ cingra mi’edaw, manga’ay paarawen ita, tatayra to ko ina ni fai

milicay toya mi’edaway a tamdaw ci Sera, sowal sa ci Sera manga’ay to, tatayra ho kako i lotok mikilim to ’aol saan, tolo ko romi’ad mikilim kako, ano ira to ko mialaan no mako to sapi 'edaw haw, tahidang han to ako kiso. Nawhan o tatayra ho kako i mararaa:ay a lotok caayay ho karakat no tamdaw, caayay ho katefing no tamdaw a 'aol, mamiala ho kako hanaw tolo a romi'ad.

Toloay to a romi’ad mitahidang to ci faian, ta patayra han to nafai ci Tomay i loma’ na Sera mipa'edaw, tangasa ca fai i loma’ na Sera, ta misi 'oway kora a mama mi 'oway tora 'aol, misakohepic tora 'aol, tatodong ko saka tayal nira kora 'aol, masa kohepic masanga' nira kora 'aol mi'edaw to cingra, pakafit han i tini i wa'ay ningra, satikotiko han ningra pakawali, pakawanan i wa’ay nira, ta caciyaw to cingra, alatek o lisin no mato'asay koni, ya mi'edaw cingra manengneng nira, aya: kona wawa moraraw ko pangangan tona wawa, caay ka tama falicen ko ngangan nona wawa, ma'epongay kona wawa saan, ano caay ka falicen ko ngangan nona wawa, alatek mapatay kona wawa saan, nano yanan cima hanen pangangan sa cangra? paka ci Namoh hannen saan cangra, sa dafadafak sato fangcal soeso sato masoeso, tanetek to ko tireg ni Namoh matini.